O catro de novembro celebrouse no noso instituto o II Día da Ciencia en Galego co gallo de reivindicar o uso da nosa lingua para as materias científicas. Este ano a Coordinadora Galega de Equipos de Dinamización Lingüística deu a oportunidade a cen centros de Galicia (que cumpriran certos requisitos) de asistir a unha videoconferencia impartida por D. Ángel Carracedo, que foi emitida desde a cidade de Natal en Brasil. D. Ángel Carracedo, científico galego de elite mundial, falou para máis de seis mil alumnos de xenética forense, dos avances desta rama nas últimas décadas e do que se conseguiu grazas a eles. Comentounos como descubrimentos na composición do ADN favorecen, por exemplo, a investigación no ámbito criminal, no ámbito da xenética e da medicina en xeral. Contestou a un montón de preguntas que alumnos de toda Galicia lle enviaban vía chat e , todo isto dunha forma amena e apropiada para nós.
Debemos sentirnos afortunados de que un gran investigador e médico forense, solicitado polas policías científicas de moitos países, persoa clave na resolución de moitas identidades, aceptara a invitación dos equipos de normalización para ofrecer unha conferencia destas características. Paula Gondar Núñez, 1º de Bach. A
