SAMAÍN E MAGOSTO 2022!!!

Ao longo desta semana estivemos celebrando o Samaín e Magosto. Para iso, o alumnado preparou unha serie de actividades con bailes e cancións, amais da tan ben acollida decoración. 

Así ben, desde Biblioasorey e Dinamización Lingüística organizáronse os concurso de espantallos diabólicos e tamén de microrrelatos de terror. 

Todas estas actividades estiveron acompañadas dos tradicionais xogos populares de Cándido Mascato que sempre son un éxito entre a mocidade e non tan mocidade... 

Para o ano, máis e mellor!!! 

SEMANA DA MÚSICA...

Hoxe, día de Santa Cecilia, arrinca a Semana da Música grazas ao Departamento de Música que dirixen a profesora Ofelia e o profesor Moisés. 

Comezamos cunha FOLIADA, tamén coñecida como serán, ruada, fiadeira... Ten orixe nas celebracións folclóricas asociadas aos traballos do campo. Cando chegaba o inverno e non se podían traballar as terras ou saír co gando, os veciños xuntábanse para realizar traballos colectivos (matanza do porco, trasego do viño...) e socializaban con música tradicional galega e baile. Os instrumentos máis utilizados nestas celebracións eran as pandeiretas, cunchas e gaitas, entre outros. 

Velaquí ao noso alumnado deleitándonos cunha boa foliada matutina!!!

 

CONCURSO DE CABAZAS DE SAMAÍN, 2021.

 Velaquí as cabazas gañadoras do Samaín 2021!!!

A semana da ciencia no Asorey

Este ano as actividades  xiran arredor da conmemoración do Ano Internacional das Froitas e Verduras (FAO) e o 150 aniversario da publicación do libro  A orixe do home de Charles Darwin. Así pois, ademais de falar da química na horta e de almorzos saudables, desde esta semana pódese ver unha exposición sobre Charles Darwin, organizada polo departamento de Bioloxía e a Biblioteca Asorey, centrada nas diversas publicacións e edicións dos seus libros, con paneis informativos, o baúl de viaxe de Darwin no Beagle e unha recreación sonora inspirada nos diferentes lugares polos que transcurriu dita viaxe.

BANDA SONORA DA VIAXE DO BEAGLE

O 11 de novembro, o alumnado de 3º de ESO gozou dun almorzo saudábel  co que aprenderon sobre as vitaminas que consegue o organismo con determinados alimentos e a importancia de almorzarmos todos os días. 

Carme Hermo presenta "Man de Camelle" no IES F. Asorey.

Hoxe visitounos Carme Hermo, unha pintora e profesora que veu falar da vida e da obra de Man de Camelle. Precisamente, así é como se titula o libro que, sobre este recoñecido personaxe da Costa da Morte, escribíu e publicou na editorial Kalandraka. 

A charla foi coordinada pola profesora e tamén artista Rocío Domenech para o alumnado de 1º de ESO. Didáctica, emotiva, suxerente e sempre perfectamente acompasada coas imaxes e os debuxos que a pintora elaborou para da a coñecer a vida e obra de Man, ese alemán de Camelle. 

XELA ARIAS DA MAN DE YOLANDA CASTAÑO.

O pasado 18 de maio tivemos a sorte de contar coa visita de Yolanda Castaño. Veu a falarnos sobre o seu último traballo, Xela quixo ser ela, onde profundiza sobre a biografía da autora homenaxeada nas Letras Galegas 2021 e tamén sobre o papel da lucense na nosa literatura. 

 

PODCAST SOBRE XELA ARIAS. LETRAS GALEGAS 2021.

As Letras Galegas do 2021 dedícanse á poeta, tradutora e editora Xela Arias. Para rendírmoslle a nosa pequena homenaxe , alumn@s do noso instituto guiad@s por un grupo de profesor@s, gravamos uns podcasts para percorrermos e achegarmos algo máis sobre a súa figura e a súa obra.  Estes podcasts xorden de interpretacións subxectivas e persoais. Así pois, alumnos e alumnas de 1º de ESO len poemas de Xela Arias mentres comparten alegres comentarios nocturnos; alumnas e alumnos de 2º de ESO elaboran un interesante concurso de Letras para as Letras dedicacas a Xela Arias; alumnas e alumnos de 4º ESO fan un percorrido artístico para louvar e conmemorar a esta ilustre figura literaria. Estas son algunhas das gravacións que fixemos e que agora vos amosamos para que as escoitedes con cariño. Desexamos que sexan do voso agrado.

HAIKUS NO CONFINAMENTO

Neste tempo de confinamento estamos pasando moito tempo contemplando a vida pasar a través das nosas ventanas, verdade? Así facían os poetas xaponeses cando compoñían un dos seus tipos de poema máis coñecidos, os Haikus. Dende a Biblio do Instituto querémosvos convidar a sacarlle partido a todo ese tempo de contemplación, así que vos deixamos un pequeno tutorial de como compoñer Haikus sobre todas aquelas cousas fantásticas que vemos estes días polas ventanas das nosas casas... se sabedes contar sabedes facer Haikus. Animádesvos?


            

ARRANCA O CLUB DE LECTURA!!!

O pasado venres deu comezo o Club de Lectura deste novo curso. Comezamos cunha obriña de teatro, Ruído nunha noite de verán de Mª Inés Falconi. Trátase dunha versión da famosa obra de Shakespeare, Soño dunha noite de verán.

Estanos gustando tanto que... En breve haberá algunha sorpresiña!!

E ti, a que agardas? Únete ao noso clube e goza da lectura adozada con chocolate.